ఓ కార్యకర్తా నీకు గుర్తింపేది? పార్టీ జెండా మోసి అలసిన బతుకుల ఆవేదన!

కార్యకర్త అంటే.. బీరు, బిర్యానీకి అమ్ముడు పోయేటోడు?, కార్యకర్త అంటే చివరి వరుసలో నిలబడేందుకు కూడా అర్హత లేనోడు, కార్యకర్త అంటే జెండా కూలీ మాత్రమే? ఇది కొంతమంది నాయకులలో.. పార్టీ కార్యకర్తల మీద ఉన్న అభిప్రాయం.

ఇది ఒకప్పటి మాట..

ఇప్పుడు పార్టీలు మారి వచ్చేటోళ్లకే పైసలు, పనులు, కుర్చీలు, కాంట్రాక్టులు. నాయకుడిని మోసేటోనికే పదవులు, నాయకులతో పాటు పార్టీ మారేటోనికి సకల మర్యాదలు. ఏ పార్టీ అధికారంలో ఉంటే ఆ పార్టీలోకి మారేటోళ్లకే ఇయ్యాల రేపు రాజకీయాల్లో గౌరవం, గుర్తింపు దక్కుతున్నాయి.

నేడు నిఖార్సైన కార్యకర్తలు పార్టీలకి అవసరం లేదన్నట్టుగా నాయకులూ వ్యవహరిస్తున్నారు. ప్రస్తుత రాజకీయాల్లో.. నిజాయితీ గల కార్యకర్తలకు విలువ లేదు. పార్టీ ప్రతిపక్షంలో ఉన్నప్పుడు.. ధైర్యంగా జెండాను భుజాన ఎత్తుకుని గర్వంగా చెప్పుకునే కార్యకర్తను, పార్టీ అధికారంలోకి వచ్చిన తర్వాత వాళ్ళని జెండా మోసే కూలీలుగా చులకనగా చూస్తున్నారు. పార్టీకి నమ్మిన బంటుగా ఉన్న కార్యకర్తలకు, అర్హత ఉన్నా సరే పక్కన పెట్టి.. పైసలిచ్చి పైరవీ చేసేటోళ్ళకి, వేరే పార్టీ నుండి వచ్చినోళ్ళకి, అర్హత లేనోళ్లకి, అసలు పార్టీతో సంబంధం లేనివాళ్లకు, తన వర్గానికి చెందిన అనుచరులకు మాత్రమే ప్రాధాన్యం ఇస్తున్నారు.

"కార్యకర్తల శ్రమకు కొలమానం లేదు.
వారి త్యాగానికి ప్రతిఫలం లేదు."

"సవాళ్లు విసురుకునేది నాయకులు, బలయ్యేది మాత్రం కార్యకర్తలు."

ఒకప్పుడు నీతి, నిజాయితీతో కూడిన రాజకీయ నాయకులు ఉండేవారు. పార్టీ సిద్ధాంతాలకు కట్టుబడి విలువల కొద్దీ రాజకీయం చేసేవారు. ప్రస్తుతం పార్టీలు కల్తీ అయ్యాయి, సిద్ధాంతాలు కరువయ్యాయి. అధికారమే జెండా, గెలుపే ఎజెండాగా పని చేస్తున్నారు.

నీ జీవితం నీదే, నీ కుటుంబం నీదే.. నీకు ఆపద వచ్చినప్పుడు నీ కుటుంబానికి న్యాయం చేస్తామని ఉచిత వాగ్దానాలు చేస్తారు, కాని చివరకు ఎవ్వరూ ఏమీ చేయరు.

ఈ రోజుల్లో సిద్ధాంతపరమైన పార్టీలు కరువయ్యాయి. ఒక పార్టీలో ఎక్కువ సంవత్సరాలు ఉంటే గుర్తింపు ఉంటుందనుకోవడం అవివేకం. నాయకులు మారిల్లు, నాయకులతో పాటు పార్టీల మనస్తత్వం కూడా మారింది. అధికారం వైపు పరుగులు పెడుతున్నాయి.

"ఆ పార్టీ ఈ పార్టీ అని తేడా లేదు.. అన్ని పార్టీలల్లా గిదే జరుగుతుంది. ఆ నాయకుడు ఈ నాయకుడు అని తేడా లేదు, అందరు నాయకులు గట్లనే చేస్తున్నరు."

కార్యకర్తల ఆవేదన - ఆగ్రహం

"సమయం వచ్చినప్పుడు కార్యకర్తల సత్తా ఏంటో చూపిస్తాం, మీ అధికార గర్వాన్ని, అహంకారాన్ని అణగదొక్కుతాం. మేము మీవల్ల లాభపడింది ఏం లేదు. ఎలాగూ నష్టపోయాం, ఇంకా నష్టపోయేదేం లేదు. నిఖార్సైన కార్యకర్తలను దూరం పెట్టి, వలసవాదులతో కలిసి ఎలా గెలుస్తారో చూస్తాం. మీకు అధికారం దూరమైతే, ఓటమితో ఒంటరైతే అప్పుడైనా కార్యకర్తల విలువ తెలుస్తుంది."

చివరి వరకు పార్టీలో ఉండేదెవరు, మీరు ఓడిపోయిన వెంటనే పార్టీ మారేది ఎవరో తెలుస్తుందని వారి అభిప్రాయం వ్యక్తపరుస్తున్నారు. పార్టీని గెలిపించి తాను ఓడిపోతూ కూడా, ఇంకా ఆ జెండానే పట్టుకుంటూ తన గుర్తింపు కోసం ఎదురుచూస్తున్నాడు. అధికార పార్టీ అసంతృప్త కార్యకర్తలను అక్కున చేర్చుకుని బలం పెంచుకునేందుకు ప్రతిపక్ష పార్టీలకు మంచి అవకాశంగా మారుతుంది.

"కసితో పనిచేసే కార్యకర్తలు.. పార్టీని గెలిపించే వరకు శ్రమిస్తూనే ఉంటారు."